Rooie wien en dreuge worst
Regio/Klazienaveen – “Rooie wien en dreuge worst”. Een kerstverhaal maar dan net even anders. Rooie wien en dreuge worst is geschreven in het Drents door Jans Jagt.
Rooie wien en dreuge worst
Met die rot auto is altied wel wat aan de haand.
Aaldert had bosschoppen daon in het dörp wiederop. Een weeke veurraod, hufde hie veurlopig niet weer. En met de Karst wat extra’s.
Een neudzakelijke bezigheid die hie sinds het overlieden van zien vrouw al vier jaor allennig mus daon. Aaldert redde zich er best met. Binnen een half uur had hie zien winkelkarre gevuld. Daornao nog een half uur praoten met bekenden uut ’t dörp.
Winkel’n was voor Aaldert ok een sociale bezigheid worden.
’t Leup al tegen vief uur op deze kaole en winterse dag. Het was al donker worden. Het duurde nog een kleine tien minuten veurdat hie thuus was.
Verdorie, de auto begun nou echt te sputter’n. Verleden week hef hie nog een grote beurt en een APK had bij garagehoulder Kort in ’t dörp.
Nou deed de auto hielemaole niks meer
Aaldert leut zien auto uutvier’n in de berm. En t begun nog te sneien ok.
En nou?
Met een geopende motorkap stond Aaldert veur zien auto te kieken. In ’t duuster was het muilijk zuuken naor de oorzaok van de argenis.
Ok had hie zien mobieltje thuus laoten liggen. En auto’s passeerden hom al hielemaole niet meer um dizze tied. Iederiene had t drok een dag veur de Karst.
’t Zat Aaldert niet met.
Tweehonderd meter wiederop stond de grote villa van weduwe Wiersema. Kon hie daor misschien garage Kort bellen?
“Goedenavond meneer Oosterrood, wat kan ik voor u doen?”
In de deuropening stun een mooie vrouw van tegen de vieftig. Zo’n drie jaor geleden was heur man overleden an een hartinfarct. Aaldert had er iegenlijk nooit op let ,maor de weduwe was van zien leeftied. De familie Wiersema was iegenaor van bie’nao alle landbouwgronden rondom ’t dörp en beud veul warkgelegenheid. Ze stonden bekend as goode werkgevers. Nao ’t overlieden van heur vao was ’t boerenbedrief veurtzet deur de twee zeuns.
Aaldert legde de situatie uut waorom hie hier anbelde.
“Kom er maar in, de telefoon staat op het dressoir”.
“Ben er over een kwartiertie” antwoordde Kort op ’t verzoek van Aaldert of de garagehoulder naor zien auto kon kieken.
De weduwe en Aaldert hadden al bie’nao een half uur over koetjes en kalfies praot maor nog steeds gien Kort.
“Mag ik nog een keer bellen?”
Maor nao drie kwartier nog steeds geen garagehoulder.
“Mag ik u een glas rode wijn aanbieden? Het is toch bie’nao Karst” Aaldert keek de weduwe verbaosd an. Dat had hie niet verwacht. Ach, waorom ok niet. Iegenlijk was ’t ok best gezellig. Aaldert had alle tied.
Liesbeth was best een leuke en aordige vrouw.
Aaldert drunk liever een glas bier. Maor nao zien vierde glas wien smaokte rooie wien ok iegenlijk best lekker.
“Zal ik dreuge worst uut de auto haolen? Ben net naor de supermarkt west en er liggen vier dreuge worsten te wachten um tiedens de Karst opeten te worden”. Ja, dat was volgens Liesbeth een good idee.
Pas tegen elf uur kwam garagehoulder Kort an de veurdeure van de villa.
“Man, ik heb joe over zucht, nog net geen plietsie beld. Wie verwacht joe hier dan ok? Weet je wat er an de haand is met joen auto. Die hef behoefte aan een beedie benzine, zonder lup de motor niet”.
Verbaosd en met inmiddels waoterige oogies keek Aaldert garagehoulder Kort allennig maor an.
“Aaaaldert, zzzzal iiik je nog eentje inschenken?” klunk de stemme van Liesbeth vanuut de veurkamer.
“Ik begriep ’t al, Aaldert, pak nao de Karst maor een jerrycan en loop maor naor ’t benzinestation. Het beste der met”.
“Gggeef er ok nog een ssstukkie dreuge wordt bij, Liesbeth”.
Aaldert perbeerde Liesbeth uut te leggen waorom de garagehoulder een beedie kwaod was.
Beiden hadden de grootste lol.
Tot in de kleine uurties bleef ’t op dizze Karstavond gezellig in de veurkamer van de villa van weduw Wiersema.
Het klikte hiel good tussen Aaldert en de weduwe.
Het was eerste Karstdag al tegen tienen west dat Aaldert wakker weur. Het miauwde een beedie in zien heufd. Naost hom lag Liesbeth. Hij gaf heur een smok op ’t veurheufd.
Aaldert is nooit meer weg west.
Een garagehoulder Kort?. Aaldert bracht hom nao de Karst een flesse rooie wien en een dreuge worst veur de muite.
Jans Jagt
(Foto: AI image)
